U ritrattu di Dorian Gray – Il ritratto di Dorian Gray di Oscar Wilde

Riassuntu

Un jornu, nni Lady Brandon, Basil Hallward, ca è un pitturi, canusci a un picciottu giovani e biddazzu assai, Dorian Gray. Di ‘ddu mumentu innanzi, Basil e Dorian addiventanu amici stritti, addivintannu Dorian puru u principali mudellu d’ispirazziuni di l’amicu artista.

Lu pitturi, ‘nfatti, angumincia a cunsidirari Dorian comu “fonti di novi rapporti tra i culura, novi linj”, uggettu d’arti d’una biddizza giovani, pura.

Lord Henry Wotton, ammèci, canusci a Dorian â casa du sò amicu Basil, propria ‘ddu jornu ca Basil havia a finiri un ritrattu du picciotteddu. Basil, c’havi d’ora ca canusci Henry, sapennu ca iddu eni tecchia curiusu e strafalariuseddu, cci’addumanna d’evitaricci a Dorian di veniri a cuntattu cu li sò idei fuddischi ngapu li biddizzi, d’un ci llu cunzumari… Henry, ammèci, voli canuscilu e voli parracci, e accussé inzisti ppi canuscilu ca all’urtimu i du’ picciotti fannu amicizzia.

Zoccu fa rifletteri chiôssà a Dorian, è lu pinzeri ca la biddizza di li cosi unn’è eterna, ma ogni jornu ca passa va calannu, e ca ppi chissu s’havi approfittari di quannu s’è ancora giovani e picciutteddi. Infatti, quannu Basil leva d’addipingiri, e arrigala u quatru a Dorian, iddu allocu d’essi cuntenti, si pigghia la pena ppu fattu, ca mentri iddu andrà sempri ‘nbicchiennu, u quatru restarrà sempri daccusse; – macari – dici – si putissi essi u contrariu – L’amicizzia tra Henry e Dorian, cu lu tempu addiventa sempri chiù forti, mentri si ‘ndebbulisci chidda tra di Dorian e Basil, a causa di la fraggilità di l’arma e du caratteri di Dorian, ancora picciotteddu. E difatti, angumincia, manu a manu ca veni influinzatu di l’idei di Henry, a mutari d’atteggiamentu.

Tempu doppu, Dorian cunfida a Henry di vulirisi maritari cu na picciotta, Sybil Vane, n’attrici, ma Henry a picca a picca, u cumminci a lassalla. E quannu Dorian lassa a zzita, idda ppi la pena s’ammazza… A daricci a notizzia è propriamenti Henry, accussé comu è Henry ca lu “cunorta”, sempri ku li so idei strafalari, facennulu addivintari sempri chiù peju, vizziatu, egoista.

U stessu jornu, Dorian s’adduna ka lu ritrattu sò, magicamenti cangiau: inbicchiau e addivintau chiù ladiu, e pirfinu lordu di sangu. Capisci accussé ca u sò votu s’avvirau, iddu rimani sempri giovani, mentri ca u quatru inbecchia ô sò postu… U ritrattu addiventa accussé comu nu specchiu di la sò cuscienza, di la sò arma.

Addicidi d’ammucciari u ritrattu, e cuntinua a viviri la sò vita, a ‘ssu puntu, sempri chiù vizziata. Quannu Basil, l’amicu pitturi, veni a sapiri ca Dorian ammèci di teniri u luttu ppa zita morta, cuntinua a circari comu addivirtirisi, cci và a la sò casa ppi spiaricci lu picchì si comporta accussé. A la fini li du’ picciotti si sciarrianu, e Dorian finisci pp’ammazzari ô so amicu Basil. Arrinesci a fari spirìri u corpu grazzi a l’ajutu d’un chimicu, ca po’, pintutu, s’ammazza puru iddu… E mori puru u frati di Sybil, mentri assicutava a Dorian ppi vinnicarisi.

Doppu tutti ‘ssi morti, u ritrattu addiventa sempri chiù lordu di sangu, sempri chiù ladiu e ‘ngrasciatu comu a cuscienza di Dorian. Accussé ca iddu, all’urtimu, addicidi di distrujiri u ritrattu, ppu fattu, immagginabbili, di zoccu iddu rapprisenta ora; piglia un cuteddu e va versu u quatru, ma mentri ca culpisci u cori du ritrattu, u votu si sciogghi e cadi mortu iddu propria. U ritrattu torna beddu arrè com’era quannu fu fattu, mentri u corpu di Dorian addiventa biecciu, lordu, ripugnanti, tantu ka li servi lu ponnu arricanusciri sulu pi l’aneddi ka iddu purtava.