Manifestu pi na lingua siciliana unificata

Stu manifestu è a prima inizziativa di n’gruppu di Siciliani, in Italia e di l’esteru, di stabiliri i principi di basi pi na lingua siciliana unificata (LSU).  Picchí na lingua siciliana unificata?

Non ni putissimu cuntintari du sicilianu parratu, cu tutti i differenzi di parrati ca in generali tutti i siciliani capemu? U problema è puliticu: si vulemu rivindicari a nostra identità di Siciliani, una parti imputtanti da nostra identità è a nostra lingua, ca cunteni a storia da Sicilia e ca n’anu vinnutu finu a ora pi “dialettu”, ca non s’avissa parrari, vistu ca, secunnu certuni, u ‘talianu fussi a unica “lingua vera”, tutti l’autri ssennu “dialetti d’ignoranti”.

Sapemu ca inveci u Sicilianu:

– è na lingua du gruppu di lingue “romanze” e no ‘n “dialettu”, du puntu di vista linguisticu;

– è sempri vivu, tantu in Sicilia comu ne comunità Siciliani all’esteru e non c’è periculu ca scumpari, comu autri lingui “riggiunali” na Europa [magari a idea di “lingua riggiunali” è politica e unn’è scientifica: u finlandesi è na lingua naziunali, cu pocu chiossai di 1’700’000 ca parranu-u sicilianu mancu è ricanusciutu comu “lingua riggiunali”, mentri ca ammenu 3’500’000 a parranu-sulu ‘n Sicilia…];

– s’avissi nzignari nte scoli, secunnu u statutu da regioni Sicilia, ma nuddu fici mai nenti finu a ora.

Avemu bisognu d’una difinizzioni di lingua siciliana unificata, pi fari chiddu ca non s’a fattu finu a ora, pi rivinnicari a nostra identità e a nostra storia, ca non è a stissa da storia d’Italia.

Nuatri siciliani di varii parti da Sicilia,

– Cumminti ca a lingua siciliana è na parti importanti da nostra identità culturali,

– Virennu ca i cosiddetti “autorità regionali” da Regioni Sicilia non fanu nenti pi nzignalla e mancu pi sviluppalla;

– Cunzidirannu ca senza n’espressioni scritta a nostra lingua po’ suffriri;

– Cunzidirannu ca vulemu favoriri a stampa in sicilianu;

Vulemu:

– Mettiri insemi l’elementi comuni ne vari parrati di Sicilia [esclusi i parrati d’origini francisa e albanisa];

– Definiri un’ortografia unica du Sicilianu modennu (ca non è sempri a stissa du Sicilianu anticu) ca pimmittissi a ogni sicilianu di leggiri e di scriviri in sicilianu;

– Pubblicari u risuttatu du nostru travagghiu, insemi cu na lista di autori siciliani (ca scrissinu o scrivunu in sicilianu).

Pi chissu facemu n’appellu a tutti i Siciliani e i Siciliane ca su intirissati a travagghiari cu nuatri, di scrivirinni (massimo.mauro@pobox.com) e accuminciari appena possibili, circannu di cunchiuriri stu travagghiu prima da fini du 2003, prisentannu u risuttatu prima ca finisci a presidenza italiana da Unioni europea [lugliu-dicembri 2003].